Habil RzaNur Mustafayev:"Ay adam balası,bir,başa düş də..."



...DEYƏSƏN ŞAİRLƏŞİRƏM...

Şeirlərdə gəzin məni!
Mən artıq evdə qalmıram.
Acanda şeir yeyirəm,
Çoxdandı çörək almıram!

Şeirdən doya bilmirəm!
Ac olsam,beş qab çəkirəm.
Babat şeir yazan kimi,
Şeirdən kabab çəkirəm.

İstəsəm şeir geyərəm!
Əllərimdə əlcək olar.
Bir şeirim şalvar olar.
Bir şeirim pencək olar.

Şeirlə ətirlənirəm.
Şeir aparram görüşə.
Qiyamət işdir,bu,şeir.
Vallah,yarıyır çox işə.

Şeirdən,çəmən salıram.
Şeirdən,çiçək dərirəm.
Çiçəklərə şeir yazıb,
Sevənlərə göndərirəm.

Görüb alır sevgililər,
Tər,ləçək-ləçəkdi,şeir.
Şeir sevən sevgiliyə...,
Solmayan çiçəkdi şeir.

Beləcə,ömür sürürəm.
Getdikcə,şeirləşirəm.
O qədər,şeir yemişəm,
Deyəsən şairləşirəm!!
05.10.2016

*********

..BU QIZA BİR ŞEİR YAZIN..

Bu qıza bir şeir yazın.
Nə olsun dodaq boyası,
Qaşına qələm çəkməyib?!
Kim deyə bilər ki, axı,
Bu qızı qələm çəkməyib!!

Tanrının da qələmi var.
Bəlkə şeirlər də yazır.
Bəlkə də, biz xəbərsizik,
Büs bütün bəşərdi bu qız.
Bəlkə elə yazılmağı gözləyən əsərdi bu qız!

Üşüyür əli, ayağı,
Nəfəsi donur bu qızın.
Gözünün yaşı qaynayır,
Ciyəri yanır bu qızın!

Bu qıza bir şeir yazın.
Bu şeirə nəfəs verin.
Bu qıza bir şeir yazın.
Yaşamağa həvəs verin.

Qurbanam elə yazın ki,
Hər sözündə bir can ola.
Şeir elə uzun olsun, başı qarışsın şeirə.
Büs bütün şeir can ola.

Bu qıza bir şeir yazın.
Bu şeirə nəfəs verin.
Bu qıza bir şeir yazın.
Yaşamağa, həvəs verin!!
29.12.2016

*********

...SƏN ÖZÜN TORPAĞA LƏKƏSƏN ADAM...

Çölünə baxırsan,adam kimidi.
Bunun adamlığı içindən ölür.
Çoxları o qədər pintiləşib ki,
Zibil qabları da acından ölür!

Ax...niyə qurumur sənin nəfəsin!
Aldığın bu nəfəs özündən ağır.
Evində külqabı doyduran kəsin,
Anası küçədən zirzibil yığır!

Bunları görəndə ürəyim donur.
Bəs necə doğranıb tikələnməsin?!
Adam var,tüpürcək olanda udur.
Deyir ki,bu torpaq ləkələnməsin.

Hər yanı kirləmə,torpağa küsmə.
Ay adam balası,bir,başa düş də...
Sən yerə zirzibil tökürsən deyə,
Bir ana bir saat yubanır işdə.

Görüm ləkə düşsün sənin üstünə!
Bu torpaq çəkəni çəkəsən adam!
Kirlə bu torpağı,kirlə bu yurdu.
Sən özün torpağa ləkəsən adam!
19.11.2016.

*********
..SƏN BELƏSƏN..

Gör necə zərifsən,necə də safsan.
Yenicə doğulmuş uşaq kimisən.
Yuxumda nişanlım,şeirdə sözüm,
Xəyalən öpdüyüm dodağ kimisən.

Can verən canımsan,kəsən qılıncım.
Sən mənim imanım,mənim inancım.
Sacların yorğanım,sinən balıncım,
Qısılıb yatdığım yataq kimisən.

Yazın qaranquşu,qışın sərçəsi,
Dağların Kəkliyi,bağın Karcası,
Tanrının ən gözəl şeir parçası,
Alnıma yazılı varaq kimisən.

Nə fəryad,nə nalə,nə bir ah bilir.
Nə qorxu,nə üsyan,nə günah bilir.
Ruhum da sevgini səcdəgah bilir.
Ziyarət etdiyi ocaq kimisən.

Əlimin qabarı,alnımın təri.
Ömrümün bəzəyi,bəzəyin zəri.
İlahi sevginin duracaq yeri,
Tanrının acdığı qucaq kimisən.
08.11.2016

скачать dle 10.6фильмы бесплатно


Daha tez məlumatlanmaq üçün yeni Facebook səhifəmizi