Bir zaman ayrılıb görəcəksən ki,ürəyin bomboşdu,başın qarışıq...



Analoq.az Tahir Talıblının şeirlərini təqdim edir:

Bu necə soraqdır yol gəlib-gedən,
Tərpətdi ovunmuş ürəyimizi.
De ki,ayrılmışıq bu cazibədən,
De ki,göynətməyir bu həsrət bizi.

Ay-intizar yüküm, söyləsəm qorxma,
Uzaq təsəlli də desəm düz olmaz.
Uzaq həsrətlərim girər yuxuma,
Həsrətlər yuxuda köynəksiz olmaz.

İnadım gözündən keçdi çoxunun
İnadım əriyib hələ dağ olmur.
Yarıyuxuluyam,yarıyuxulu,
Yarıyuxulardan ayılmaq olmur.

Yoxla ürəyimi öz istəyincə,
Sonra baxışınla sığalla,tanı.
Gecələr həsrətim qatardan öncə,
Oyadar gözətçi budkalarını.

Səni də, səni də bir dərd aparır,
Tavanı dağılmış bir alaçıqsan.
Həsrətim yüyürər üstünə sarı,
Sən əli yaylıqlı yollara çıxsan.

1982

*****

BİR QIZ, BİR OĞLAN

Axıra çatacaq bu söhbət, bu söz,
Sonra tərəddüdlər yetəcək sona.
Bir vaxt ürəyində qaraltdığın köz
Çətin ki alışa, çətin ki yana.

Qeybətlər sönəcək sevgimiz kimi,
Sənin yaddaşında nə qalacaq, nə?
Ala gözlərində buz salxımlanıb,
Sinəmdə çatdığın bu od-ocaq nə?..

Piyada qalmışam, yolum, izim qar
Qarşıma atdığın qayadı sənin.
Dünyadı, sığallar,xumarlandırar,
Bir gün də silkələr,ayıldar səni!

Soyuq küləklər də elə əsər ki,
Arada nə savaş, nə də barışıq.
Bir zaman ayrılıb görəcəksən ki,
Ürəyin bomboşdu, başın qarışıq.

Bir sevgi təzədən bir fürsət güdür,
Keçilən yolları qayıtmaq olmur.
Nə qədər xatirə kor mürgüdədi,
Vallah,xatalıdır, oyatmaq olmur.

Bir günahsız sevgi, eh, təşnə-yanıq…
Sonra ayılarsan, sonra gec olur.
Bir oğlan yaşayır ürəyi sınıq,
Bir qız təəssüflə saçını yolur.

1981

*****

Sənsiz duyğularım ömrə dərd əkər
Görən,bu dünyada axı, kimimsən?
Sən mənim əfsanəm, nağılım qədər
Sən mənim əl çatmaz həqiqətimsən.

Baxışın Gözümdə sancılıb qalıb,
Ancaq, Xəyalımda sən çən kimisən.
Gözlərim hər yerdə səni axtarıb
Doğrusu,Sən mənə vətən kimisən.
Sənsiz sevinc itər,
Qəm itər belə,
Yoxluğun qaranlıq bir dibə bənzər
Sənsiz beynimdəki fikirlər belə,
Bir didərgin düşmüş qəribə bənzər.

1984

*****

AYRILIQLAR TANRILIQDI

Gözünnən aydın görürəm,
Qəmin-göyərən yerindi.
Deməsən də mən bilirəm,
Dərdin-dərdinnən yeyindi.

Nə buludsan,nə yağırsan
Nə axan selnən axırsan,
De,niyə belə baxırsan,
Bu uçuq-sənin evindi.

Sevdalar bir yara yeri,
Yarı göyün,yarı yerin,
Ürəyimiz ura yeri,
Əllərimiz kösöv indi.

Bu nə sondu,ayrılıqdı,
Ayrılıqlar tanrılıqdı,
İçim şüşədi,sınıqdı
Məni qarğa,ya söy indi...

2000

*****

TƏK DURNA

Bürünüb göylərin qəribliyinə
Harasa bir durna təklənib gedir.
Bir qatar durnanın intizarı da
Onun qanadına yüklənib gedir.

Düşündüm,düşündüm... Sanki fikrimdən
Duman aralandı,bulud ötüşdü,
Baxdım tək durnanın arxasınca mən
Babamın bir sözü yadıma düşdü:

Harda bir qəhrəman var döyüşlərdə
Bir nəslin adını daşıyıb demək.
Bir maral buynuzu tapılan yerdə
Bir maral sürüsü yaşayıb demək.

1968

*****
HƏSRƏT NƏĞMƏSİ


Qəlbimdə ola-ola
Mən səni harda gəzim?
Ay itkin göyərçinim,
Hansı yollarda gəzim?

Dağ başı dumanlıdı,
Dərələrdə çən olmaz.
Bir dünya gözəl olsa,
Mənə heç kim sən olmaz.

Yatmaram gecələri-
Səbrim,qərarım,hanı?
Məni kim ovundurar
Gəzsəm bütün dünyanı?

Bircə əlçim buludam
Gah boşalan, gah dolan.
Mənəm səni itirib
Sonra peşiman olan...

1970

скачать dle 10.6фильмы бесплатно


Daha tez məlumatlanmaq üçün yeni Facebook səhifəmizi