Buna görə anlayanı,duyanı...



Analoq.az şair Mübariz Süleymanlının şeirlərini təqdim edir:

Ay ana

Könülləri oxşamağı bacardın,
Ocaqlarda közün qalıb, ay ana.
Bir ləyaqət heykəlitək ucaldın,
Dilimizdə sözün qalıb, ay ana.

Saçlarına düşən dəni görmüşəm,
Başın üstən ötən çəni görmüşəm,
Bal yuxumda hər vaxt səni görmüşəm,
Xəyalımda izin qalıb, ay ana,

Nə qədər ki, sağdı mənim canım da,
Ruhun gəzir gecə-gündüz yanımda,
Yada sallam səni çətin anımda,
Səndən mənə dözüm qalıb, ay ana.

Sən ki vardın, sevincimdən coşardım,
Ən keçilməz zirvələri aşardım
Hər laylana həzin nəğmə qoşardım,
Çözülməyən çözüm qalıb,ay ana.

Ömrüm günüm yaman olub nəhs indi,
Sorağını hardan alım bəs indi ?
Əsən mehlər bəlkə sənin səsindi?
Qapılarda gözüm qalıb, ay ana.

********

Özümə

Sən gələndə sevinmişdi çox adam,
Gedəndə kim ağlayacaq bəs səni?
Axirətə üz tutanda, arxadan
Çağıracaq hansı doğma səs səni?

Elə et ki, sevənlərin çox olsun,
Yaxşılıq səp tarlasına ömrünün!
Nəfsini boğ, gözün-könlün tox olsun,
Savab qazan cəfasına ömrünün!

Süleymana qalmayan bu dünyanı
Süleymanlı tərk edəcək – bu, haqdır.
Buna görə anlayanı, duyanı
Saymamağın özü də bir günahdır.

********

Yol gedirəm

Çiynimdə yatmış baxtım,
Mənzilə çatmış vaxtım,
Sularda batmış taxtım,
Gedirəm,yol gedirəm.

Dilim-dilim dilimlə,
Qabar-qabar əlimlə,
Xeyirxah əməlimlə,
Gedirəm,yol gedirəm.

Ruhum başımın üstə,
Aslan kimi qəfəsdə,
Elə bil son nəfəsdə,
Gedirəm,yol gedirəm.

Qəlbimi dağlayanla,
Gözümü bağlayanla,
Özümə ağlayanla,
Gedirəm,yol gedirəm.

Ovcumda torpağımla,
Kirimiş dodağımla,
Tutmayan ayağımla,
Gedirəm,yol gedirəm.

********

Yaz yağışı

Mən ki bir yaz yağışıyam.
Çölə çıxsan görəcəksən,
Bir aşiqin baxışıyam,
Baxışımdan biləcəksən.

Hər damlası gözlərində,
İndi yazdı-yağış dəmi,
Sevənlərin üzlərində,
Yaz yağışı nur aləmi.

Yuya bilər yaz yağışı
Çöhrəndəki günahları,
Yanımdasan,bu gün yaxşı,
Gəl gözləyək sabahları.

Ömrümüzə bahar gəlib,
Yaz yağışı müjdəçidir,
Bu sevdalı dünyamızın
Yaz yağışı gül səsidir.
скачать dle 10.6фильмы бесплатно


Daha tez məlumatlanmaq üçün yeni Facebook səhifəmizi