Şıxlinski Gülə qarşı



Şıxlinski Gülə qarşı
Azərbaycanlı diaspora liderinin dələduzluğa məruz qalmasına dair yayılan məlumatlar yalandır

Son bir neçə gündə bəzi xəbər saytlarının səhifələrində “Azərbaycan diasporasının Rusiyadakı liderlərindən biri dələduzluğa məruz qalıb”, “Azərbaycanlı diaspora liderinə qarşı 60 min dollarlıq dələduzluq” və sairə oxşar başlıqlar altında məlumat xarakterli yazılar dərc olunmaqdadır. Məzmunu eyni olan həmin yazılarda bildirilir ki, Avropa Azərbaycanlıları Konqresinin və Ümumrusiya Azərbaycan Konqresinin vitse-prezidenti Şahin Şıxlınski Azərbaycanın hüquq-mühafizə orqanlarına müraciət edərək məlumat verib ki, 2013-cü ilin iyun ayında Türkiyə vətəndaşı, 1978-ci il təvəllüdlü Emin Gül onun etibarından sui-istifadə edərək 60 000 ABŞ dolları alıb və qaytarmayıb. Həmçinin bütün bu yazıların da sonluğunda “araşdırma aparılır” ifadəsi əlavə olunub. Bu araşdırmanın kim tərəfindən aparıldığını bilməsək də, dünən bizimdovr.az-a daxil olmuş dəqiq məlumata görə, Rusiyanın Yekaterinburq şəhərində Azərbaycan diasporasına rəhbərlik edən Şıxlinski Şahin Mutvalı oğlu həqiqətən də 08.03.2016-cı il tarixində Nərimanov RPİ 18-ci Polis Bölməsinə Türkiyə vətəndaşı Emin Gülü dələduzluqda ittiham edən şikayət ərizəsi ilə müraciət etmişdir. Bölmənin təhqiqatçısı, polis kapitanı Emin Quliyev tərəfindən aparılan araşdırma nəticəsində müəyyən edilmişdir ki, Emin Gülün əməllərində dələduzluq cinayət tərkibinin olmasını sübut edən dəlillər yoxdur və qərara alınmışdır ki, cinayət işi açılması tələbi rədd edilsin.

Qeyd edək ki, Emin Quliyev tərəfindən imzalanmış bu qərar dünən “Bizim Dövr”ün redaksiyasına gəlmiş Emin Gülün özü tərəfindən bizə təqdim olunmuşdur. Digər tərəfdən də, məsələyə aydınlıq gətirən Emin Gül Şahin Şıxlinski ilə aralarında yaranmış bu problemin təfərrüatlarına dair çox maraqlı açıqlamalar vermişdir. Qonağımız bildirmişdir ki, o, Şahin Şıxlinski ilə 2013-cü ildə, Yekaterinburq şəhərində “BAKU - Plaza” adlı Ticarət Mərkəzinin tikintisi üzrə sifariş götürmək məqsədilə tanış olmuşdur. Emin Gülün təqdim etdiyi sənədlərdən məlum olur ki, ümumilikdə tikintini tam başa vurmaq üçün ilkin olaraq Şahin Şıxlinskiyə 1 537 937 ABŞ dolları məbləğində smeta dəyəri təklif olunub. Lakin sonradan, tərəflər 1 476 000 ABŞ dolları məbləğində razılaşıblar. Bundan sonra Emin Gülün rəhbərliyi altında “Stroykom” şirkəti inşaat işlərinə başlayıb. İşin getdiyi müddət ərzində baş vermiş bir çox olay və insidentlərə dair təfərrüatları buraxaraq (hələlik), onu qeyd edə bilərik ki, Emin Gülün sözlərinə görə, bugünkü günə işlərin təxminən 50%-i görülmüşdür. Lakin qarşı tərəfdən ödənişlər həyata keçirilmədiyindən, işlər dayandırılmışdır. Emin Gül bildirir ki, hazırda Şahin Şıxlinskinin görülmüş işlərə görə ona təxminən 500 000 ABŞ dolları məbləğində borcu yaranmışdır. Həmçinin qonağımızın deməyinə görə, o, bu xüsusda Yekaterinburq şəhərində məhkəməyə müraciət etmiş və məhkəmədə onun iddiası təmin olunmuşdur. Hətta, bundan sonra Şahin Şıxlinski apellyasiya məhkəməsinə müraciət etsə də, bu instansiya da ilkin qərarı qüvvədə saxlamışdır. Məhz elə bütün bunlara görə də, Şahin Şıxlinski bu gün artıq Yekaterinburqda itirməkdə olan nüfuzunu qoruyub saxlamaq, eyni zamanda da Emin Gülə təzyiq etmək məqsədilə Bakıda hüquq-mühafizə orqanlarına müraciət etmişdir. Lakin gördüyümüz kimi, polis əməkdaşları bu məsələdə tam obyektivlik və qərəzsizlik nümayiş etdirmişlər. Nəticədə Şahin Şıxlinskinin əsassız tələbi rədd edilmişdir (yeri gəlmişkən, Emin Gül iddia edir ki, bu diaspor rəhbəri Yekaterinburq polisləri ilə hər mövzuda anlaşmağı daha yaxşı bacarır). Məhz bütün bunlardan sonra, Şahin Şıxlinski son təsir vasitəsi kimi bəzi KİV-lərə müraciət etmək qərarına gəlmişdir. Bu məqsədlə də diaspor rəhbəri həmin saytları yalan məlumatla təmin etmişdir.

Qarşı tərəfin də mövqeyini öyrənməyə hazırıq.

bizimdovr.azскачать dle 10.6фильмы бесплатно


Daha tez məlumatlanmaq üçün yeni Facebook səhifəmizi