Rəna Mirzəyeva:"Günəşə boylanan pəncərəni aç"

Rəna Mirzəyeva:
Tarix: 2-01-2017, 14:30 Toplam: nəfər paylaşdı. Baxılıb: 5862


Analoq.az tanınmış şair Rəna Mirzəyevanın şeirlərini təqdim edir:

ARZULARIM

Bir zənginin həsrətini çəkirəm,
Həzin səsin qulağıma dəyəydi.
Süzgün-süzgün baxan gözlər yumulub,
Gözlərimdən xəyallarda öpəydin.

Telefondan nəfəsini duyaydım,
Şirinlikdən bir yuxuya dalaydım.
Ömrüm boyu bu aləmdə uyaydım,
Bu yuxular bir gerçəyə dönəydi.

Arabir də mesajını alaydım,
İlhamlanıb sənə şeir qoşaydım.
Hərdən bəhanələr gəzib coşaydım,
Sonra hirsim asta-asta sönəydi.

Zəng eləyib susaydın da arabir,
Naz eləyib sataşaydın yara bir.
Yol salaydın çətinliyə, dara bir,
Altdan-altdan tələ qurub güləydin.

Bu xəyallar arzularımdır mənim,
Nə biləydim bu qədərmiş qədərim...
Sevincim ol, qoy sənlə fərəhlənim,
Kaş ki səni sevdiyimi biləydin!

*******

"Hardasan? "

Məni məndən aldı sənin gedişin,
Yarım qaldı, para qaldı hər işim.
Möcüzəyə qaldı bir də dönüşün,
Məndən ayrı düşən param, hardasan?

Son baxışın, son gedişin yadımda,
Nəvazişin, son öpüşün dadımda.
Soyuqluğun ocağımda, odumda,
Yandıranım, duzlu yaram, hardasan?

Hər gecəmə bir cür qonaq gəlirsən,
Gah yuxuya, gah xəyala dönürsən.
Yoxluğunla yüz yol məni üzürsən,
Sənsiz mənə dünyam haram, hardasan?

Tale qıydı sənin cavan yaşına,
Qədər buydu – qəza gəldi başına.
Qəmli şeir hördürüm başdaşına,
Üzgün neyəm, qəmli taram. Hardasan?

Mənə həyan, dirək verən sən idin,
Mənə sevgi, ürək verən sən idin.
Mənə arzu, dilək verən sən idin,
Indi sənsiz qırıq kamam. Hardasan?
Sənsiz mənə dünya haram, hardasan?

*******

Məni bu dünyaya yenidən gətir...



Gəl qayıt o gənclik dövrünə bir gün,
Nisgilini itir, qəmini itir.
Ana, o çağlara bir daha qayıt,
Məni bu dünyaya yenidən gətir...

Günəşə boylanan pəncərəni aç,
Səhərin mehini otağa yetir.
Özün də Günəş tək nurlan, şəfəq saç.
Məni bu dünyaya yenidən gətir...

Yenidən həyata qədəm basım mən,
Qaldır, yol göstər, tut biləyimdən.
İlk "ana" kəlməsin eşit dilimdən.
Məni bu dünyaya yenidən gətir...

Dünya başdan-başa qoy təzələnsin.
Təbiət zövqümlə yeni geyinsin,
Al məni qoynuna, qəlbim isinsin,
Məni bu dünyaya yenidən gətir...

Qoyma o səhvlərə bir də qayıdım,
Qıyma yaryarımçıq yollarda qalım.
Ana, öz adını ver, mən yaşadım,
Məni bu dünyaya yenidən gətir...

Yenidən qoy aşiq olsun ürəyim,
Bu şair ruhumla sevib sevilim.
Yenidən dil açsın arzu-diləyim,
Məni bu dünyaya yenidən gətir...скачать dle 10.6фильмы бесплатно

Rəy Yazın



0 Valid XHTML 1.0 Transitional ILK-10