Habil RzaNur Mustafayev:"Nənəm yalan danışıb"



Əfsanələr yalandı.
Nağıllar gerçək olmur.
Nağıldakı gözəllər,
Əslində göyçək olmur!

Sevibmiş nağıl kimi,
Belə nağıl çox imiş.
Mənim nağılımdakı
-qızda insaf yox imiş.

Yalan! Nağıllar yalan!
Nənəm yalan danışıb!
Nəgıldakı sevənlər,
Yarsız yanıb, alışıb.

Mən də bir nağılpərəst,
Sevdim uyub nağıla.
Nə ad qoyum bilmirəm,
Məndəki bu ağıla.

Yalandan sevib məni,
Sevdiyim, canım demiş.
Bax əslində mən "siçan",
O,"tık-tık xanım" imiş.

Göydən üç alma düşdü,
Almanı kim götürər!?
Üç almalıq həqiqət,
Məndən sizə xatirə.

Nağıllar yalan olub,
Başımıza dolandı.
İnandım ki nağıllar,
Əfsanələr yalandı.

*******

Elə qəşəng olurki ayrılığın səhəri.
Çarpayın da tərtəmiz,
Bicə qırışı olmur.
Dünya dediyin şeyin, səninlə işi olmur.
Otaqın səndən küsür.
Yatağın səndən küsür.
Xəyalındakı ailən, uşağın səndən küsür.
Sən isə öz özündən,
Hər kəlmən, hər sözündən,
Lap həyatın özündən, elə rahat küsürsən.
Bir metr ip gəzirsən!!

Təsəlli başdaşları papiros kötükləri.
Aşıb daşan külqabı.
Gülündən qopardılan, yanı çatlaq gülqabı....

Ağzın da zəhər dadır.
Mədənin qıcqırtısı.
Lap təzəcə doğulmuş,
O körpə ayrılığın, göz yaşı, hıçqırtısı..

Elə qəşəng olurki ayrılığın səhəri.
Ölümlə arandakı məsafə bircə qarış.
Daxilində anandan,
Daxilində atandan,
Daxilində bacından, nə olar ölmə deyə,
Hönkürtülü yalvarış.

Elə qəşəng olurki ayrılığın səhəri.
Səni səndən gizləmir.
Nə günəş şəfəqləri,
Nə səhərin saflığı, bu qəmi təmizləmir!

Yarıaçıq pəncərə.....

Otaq səndən üşüyür.
Gecə yuxusuz olan,
Gecə sevgisiz qalan,
Yataq səndən üşüyür.

Üşüyər dodaqların.
Ölüm səndən utanar.
Elə zülüm çəkərsən,
Zülüm səndən utanar.

Elə qəşəng olurki ayrılığın səhəri.
Sonsuz hesab etdiyin bir sevginin sonusan.
Daha başa düşürsən,
İxtisasın ayrılıq,
Sən öz ixtisasının qırmızı diplomlusu,
Ayrılıq məzunusan!

Elə qəşəng olur ki......

*******

...TAPILMAZ...

Bilirəm,ömür də sirdi.
And olsun səbrim dəmirdi.
İçimi qəmim gəmirdi-
çölümü yeyən tapılmaz!

Bu belə dünyadı atam!
Mən belə dünyada yadam.
Hərdən günah edər adam,
Üzünə söyən tapılmaz.

Bu ömür atın çaparsan,
Sənindi hara aparsan,
Yolüstü bir dərd taparsan,
Mənimdi deyən tapılmaz.

Mən doğulandan beləyəm,
Beşiyəm qəmə,bələyəm!
Qorxuram ölüb eləyəm,
Dizinə döyən tapılmaz!!
15.12.2016

*******

...NƏ OLSUN...

Nə olsun yolum bulaşıq.
İzlərim ki, tər-təmizdi.
Nə olsun, dilim dolaşır,
Sözlərim ki, tər-təmizdi.

Bax, üzüm, kəfənindən ağ!
Dediyim, yalan deyil bax,
İnanmırsan, gəl, əyil bax!
Dizlərim ki, tər-təmizdi.

Əlində haram tikələr,
Çox yemə, kölgən kökələr.
Adımı "günah" ləkələr,
Gözlərim ki, tər-təmizdi!

Nə olsun yolum bulaşıq.
İzlərim ki, tər-təmizdi.
Nə olsun, dilim dolaşır,
Sözlərim ki, tər-təmizdi!!
24.12.2016

Xatırladaq ki,30 aprel saat 14-00 da Habil RzaNur Mustafayev "Əfsanlər yalandır"adlı şeir kitabını oxuculara təqdim edəcək.Tədbir kitabevim.az da təşkil olunacaq
Habil RzaNur Mustafayev:"Nənəm yalan danışıb"скачать dle 10.6фильмы бесплатно


Daha tez məlumatlanmaq üçün yeni Facebook səhifəmizi