O oğlandır bu gördüyün...



Danmadın.

Hər əzaba yandı canın,
Bəs indi niyə yanmadın,
Bəxt üzünə gülən çağı,
“Oyan” dedim, oyanmadın.

Zəhər doğradın aşıma,
Baxmadın cavan yaşıma,
Səsimi atıb başıma,
“Dayan” dedim, dayanmadın.

Sən eşqimiz xatirinə,
Nə dedim dəydi xətrinə,
Bənövşə, lalə ətrinə,
“Boyan” dedim, boyanmadın.

Ötən günlər can dediyin,
O oğlandır bu gördüyün,
Dönə-dönə söz verdiyin,
Nə yaxşı vədi danmadın.

*********

Onda

Bahardı,sevgimiz torpaqdan qalxıb,
Təzəcə boy atıb bitirdi onda,
Eşqin mehrabında qanad çalırdıq,
Günümüz qayğısız ötürdü onda.

Nə yaman olurmuş həyatın bədi,
Gələn ömrümüzü ötən gün yedi,
Bu görüş vidamı görüşü idi-,
Ayrılıq özünü yetirdi onda.

İndi dolanırıq iraqda, gendə,
Bizə sirdaş olub kədərdə, ündə,
Mənim arzularım yağışlı gündə,
Başının üstündə çətirdi onda.

Daha bizsiz qalıb o cığır,o iz,
Dünyanı yandırır qəlbimdəki köz,
Dodağından qopan hər kəlmə,hər söz,
Ürəyə yazılan sətirdi onda.

Gəlmişəm adlayıb dağ boyda dərdi,
Zaman o zaman yox, o yer o yerdi,
Bu illər bilmirəm sənə nə verdi,
Hüseynə qəm, kədər gətirdi onda.


*********

Biz üz-üzə gələndə.

Əsən külək dayanır,
Ömrüm şam kimi yanır,
Xatirələr oyanır,
Biz üz-üzə gələndə.

Yoruluram,bezirəm,
Dalğın-dalğın gəzirəm,
Dünyamdan əl üzürəm,
Biz üz-üzə gələndə.

Havasız boğuluram,
Od ilə yoğruluram,
Təzədən doğuluram
Biz üz-üzə gələndə.

Acı bəxtim ünlənir,
Məlul-məlul dillənir,
Göz yaşlarım sellənir,
Biz üz-üzə gələndə.

Nə becərim,nə əkim,
Ürəyim tikim-tikim,
Həyatdanmı əl çəkim,
Biz üz-üzə gələndə.

Ağı deyən dilimsə,
Axır günüm ölümsə,
Heç olmasa gülümsə,
Biz üz-üzə gələndə.

*********

Axı.

Günü günə satan canım,
Qəm yükündə batan canım,
Div yuxuda yatan canım,
Yuxu səni yıxar axı.

Gün qısalıb gecə uzur,
Nuru sönüb ay-ulduzun,
Bir ürəyi sevən qızın,
Çox ürəyi sıxır axı.

Məsləkimdir yoxum varım,
Həyat yolum düz ilqarım,
Billur kimi arzularım,
Ürəyimdən axır axı.

*********

Ölməliyəm?

(Bir nəfərə)

Ürəyindən keçənləri,
Gözlərindən bilməliyəm.
Sən ağlasan ağlamalı,
Gülümsəsən gülməliyəm.

Həsrətindən üzülüb can,
Daş asılıb qollarımdan.
Bundan belə yollarından,
Duman,çəni silməliyəm.

İntizarı yormaq üçün,
Buz layını qırmaq üçün.
Səni inandırmaq üçün,
De hökmənmi ölməliyəm?!

Hüseyn Əskəroğlu Zahidov

скачать dle 10.6фильмы бесплатно


Daha tez məlumatlanmaq üçün yeni Facebook səhifəmizi