“ƏLVAN İPDƏN GÖR NƏLƏR, TOXUYURLAR NƏNƏLƏR”



12-18 may tarixlərində Təhsil Nazirliyi Respublika Uşaq-Gənclər İnkişaf Mərkəzinin təşkilatçılığı, Mədəniyyət Nazirliyi, Azərbaycan Milli Elmlər Akademiyası, “İçərişəhər” Dövlət Tarix Memarlıq Qoruğu İdarəsinin dəstəyi ilə “Muzeylər və Nəsimi İrsi” proqramı üzrə təşkil edilən muzey həftəsinin əsas məqsədi uşaqlar və gənclərdə mədəni irsin saxlancı olan muzeylərimizə, qalereyalarımıza marağı artırmaq, onlara milli mədəni və mənəvi dəyərlərə hörmət hissi aşılamaq, dünənimizi qiymətləndirib, bu günümüzü dəyərləndirib, gələcəyimizi qurmaq vərdişlərini aşılamaqdır.

Milli mədəni irsin təbliği və təşviqi fəaliyyətinin əsas istiqamətlərindən olan “NUR Art House” və “Azərbaycan xalçaçıları” İctimai Birliyi 18 May – Beynəlxalq Muzeylər Günü münasibətilə və “Muzeylər və Nəsimi ili” proqramı çərçivəsində mayın 17-də saat 14.00-də Bakı şəhəri, Xəzər rayonu, Türkan qəsəbəsi, 262 saylı tam orta məktəbin 2a sinif şagirdləri ilə birlikdə İçərişəhərdə “Əlvan ipdən gör nələr, toxuyurlar nənələr” adlı interaktiv tədbir təşkil edir.

Muzeylərin cəmiyyətdə rolu dəyişir – onlar məkanlarını dəyişməyə səy göstərir, interaktiv olur, auditoriyaya və yerli icmaya istiqamətlənir, həmçinin müxtəlif vəziyyətlərə uyğunlaşmağa cəhd etməklə, istənilən dəyişikliyə mütəhərrik münasibət göctərməyə çalışır. Onlar mədəniyyət mərkəzlərinə çevrilirlər, yaradıcı peşə sahibləri ilə yanaşı, alimlərin də müştərək layihələr həyata keçirə biləcəyi platformalar olmaqla, ziyarətçilərin nə isə yeni bir işin yaradılmasında həmiştirakçı olmaq, təəssüratlarını bölüşüb və qarşılıqlı əlaqələr qurmaq üçün məkan olurlar. Məhz bu səbəbdən 2019-cu ildə Beynəlxalq Muzeylər gününün mövzusu “Muzeylər mədəniyyət mərkəzləri kimi: ənənələrin gələcəyi” seçilib.

Kolleksiyaların komplektləşdirilməsi, qorunması, öyrənilməsi, interpretasiyası və tanıtımı kimi ənənəvi funksiyalarını saxlamaqla muzeylər xidmət göstərdikləri icmaya yaxınlaşmaq məqsədilə iş üsulunu dəyişirlər. Bu gün muzeylər müasir sosial problemləri və münaqişələri həll etmək üçün yenilikçi üsullar axtarışındadırlar. Lokal işləyən muzeylər icmaların hüquqlarını müdafiə etməklə yanaşı, qlobal problemlərin həllinə təsir də göstərə bilir.

Cəmiyyətin inkişafının mərkəzində yerləşən müəssisə kimi muzeylər, mədəniyyətlər arasında dialoqun qurulmasını vərpa edə, xalqlar arasında yeni körpülər qura və davamlı inkişafa zamindirlər.

Muzeylər kolleksiyaların qorunmasl və interpretasiyasında yeni yollar tapır, gələcək nəsillər üçün yeni əhəmiyyət kəsb edəcək və müasir auditoriyanın müxrəlifliyində aktuallığını itirməyən yeni ənənələr yaradırlar. Mədəniyyət sahəsində baş verən bütün proseslər muzey peşəkarlarını həm muzeyin missiyasını, həm də muzey işinin təbiətini müəyyənləşdirən etik sərhədlər məsələsini yenidən nəzərdən keçirməyə sövq edir.

Daimi və müvəqqəti ekspozisiyası, öz ənənələri olan “NUR Art House” İCOM-un 2019-cu il üzrə çağırışına cavab verərək, “Azərbaycan xalçaçıları” İctimai Birliyi ilə birlikdə bu bayramı uşaqlarla keçirməyi və mədəniyyət mərkəzi kimi, ənənənin gələcək daşıyıcıları və yaşadanları olan balalatımızı milli dəyərlərimizə bir qədər də yaxınlaşdırmağı qarşısında məqsəd qoyaraq sözügedən tədbiri Türkan qəsəbəsində yerləşən 272 nömrəli tam orta məktəbin ikinci sinif şagirdləri ilə birlikdə həyata keçirməyi planlaşdırır.

Uşaqlar bineyi-qədimdən məişətimizin ayrılmaz hissəsinə çevrilən, evimizə rahatlıq, qəlbimizə gözəllik gətirən, uçan xalça vasitəsilə əsrlərdən nəsillərə ötürülən, Azərbaycan incəsənətinin ən canlı növü olan xalçaçılıq sənətinin ecazkar dünyası ilə tanış olacaqlar.

Xalçaçılarla xalçasevərlərin bayramına çevriləcək həmin gün uşaqlar valideynləri ilə birlikdə NUR Art House-da nümayiş olunan xalçaların nağıllarını dinləyəcək, xalçanın hazırlanma texnologiyası ilə canlı tanış olacaq, ilmələrin sehrinə vaqif olub, naxışların ecazkar aləminin gözəlliyindən duyğulanacaqlar. Xalçaçı-rəssamlarımızdan ornamentlərin sirlərini öyrənəcək və öz xalçalarını yaratmaq üçün eskizlər işləməyə səy göstərəcəklər.

“Azərbaycan xalçaçıları” İctimai Birliyi İdarə Heyətinin üzvü, xalçaçı-rəssam Eldar Hacıyevin, keçəçi-rəssam Rauf Əbdülhüseynoğlunun və digərləri Azərbaycan xalçaçılıq sənətindən, onun özəlliklərindən danışacaq, qonaqlara təcrübi vərdişlər aşılayacaqlar. “Ustad dərsləri”ndən bəhrələnən 262 nömrəli tam orta məktəbin şagirdləri isə öyrəndikləri əsasında təəssüratlarını rəsmlərlə ifadə edəcək, sinif rəhbəri Sevda Dadaşovanın rəhbərliyi ilə hazırladıqları səhnəcikləri göstərəcək, şeirlər, sayaçı sözlər söyləyəcək, tapmacaların açmalarını xalça naxışlarında arayacaqlar. Bəlkə də gələcəkdə yaradacaqları xalçalarının ilk özülünü burda qoyacaqlar.

Sənət paylaşdıqca inkişaf edir, püxtələşir, zənginləşir. Dekorativ-tətbiqi sənətlə yanaşı, incəsənətin müxtəlif sahələrinin obyektinə çevrilən Azərbaycan xalçası, xalçaçılıq sənəti ilə məşğul olanlara geniş yaradıcılıq imkanları açır, Azərbaycan mədəniyyətinin bu əvəzsiz incisinin bədii, texniki, sosial-iqtisadi dəyəri ildən-ilə yüksələn xəttlə artır.

Azərbaycan incəsənətinin öyrənilməsi, təbliği və inkişafı istiqamətində çalışan NUR Art House bu dəfə qapılarını balacaların üzünə açmaqla, onlarda tariximizin aynası Azərbaycan xalçasına və onun bizə ötürmək istədiyi ismarışlara diqqəti cəlb etmək, böyüməkdə olan nəslə mədəni irsimizin ən dəyərli nümunələrini tanıtmaq və onlara sənətin yaşadılmasının əhəmiyyətini hədəfə alır.
Tədbir 17 may 2019-cu il tarixində saat 14.00-də İçərişəhər, Qəsr küçəsi, 27 ünvanında yerləşən NUR Art House sənət məbədində keçiriləcək.

Analoq.az
скачать dle 10.6фильмы бесплатно


Daha tez məlumatlanmaq üçün yeni Facebook səhifəmizi