ƏdəbiyyatRedaktor seçimi
“Zirvəsindən qar yediyim,o dagları hardan alım…”
Çeşməsində durulduğum,
Bulaqları hardan alım?
Alovundan qovrulduğum,
Ocaqları hardan alım?
Bir gözələ vurulduğum,
Gözlərinə qul olduğum,
Yollarında yorulduğum
O çağları hardan alım?
Bəhrəsindən bar yediyim,
Dövlətindən var yediyim,
Daldalanıb nar yediyim
O bağları hardan alım?
Həvəsiylə nəfəs kəsən,
Dişləyəndə tezcə küsən,
Öpüşümdən tir-tir əsən
Dodaqları hardan alım…
Ağızımda söz yandıran,
Ürəyimdə köz yandıran,
Üz qoyanda üz yandıran
Yanaqları hardan alım…
Yamacında yar yediyim,
Ətəyində bar yediyim,
Zirvəsindən qar yediyim
O dağları hardan alım?
Tural İrfan günah çəkər,
Həsrətli qız min ah çəkər.
Saçlarıma daraq çəkən,
Barmaqları hardan alım…
Tural İrfan
Xəbəri qiymətləndir
[Ümumi: 0 Ortalama: 0]
