“Çünki, mənəviyyatları sıfırın altındadır”- RAZİ NURULLAYEV
“…aparıb ölülərini hörmətsiz şəkildə dəfn edərlər” – Deputat iddialara cavab verdi
Milli Cəbhə Partiyasının (MCP) sədri, deputat Razi Nurullayev yaxını vəfat edən bir neçə İmişli sakinini baş sağlı vermək üçün evində ziyarət edib. Deputat həmçinin hər zaman olduğu kimi şəhid ailələri, qazilərlə də görüşüb, xəstələrə baş çəkib.
Bəzi medi qurumları isə bunu xüsusi karantin rejimi qaydalarının pozuntusu, kobud qanun pozuntusu kimi qələmə verərək xəbər ediblər.
Deputat bu xəbəri hazırlayanlara cavab verib. O, bildirib ki, belə jurnalistlər, şəxslər bütün dəyərləri taptalayaraq sadəc sensasiya, oxunma sayı axtarışındadırlar:
“Təəssüf edirəm ki, mətbuat dostlarımız da sensasiya axtarır, baxış, çox oxunma axtarır. Dünən mənim yaslarda iştirakımı da sensasiya ediblər. Onlar üçün yazdıqları şəxsin kimliyi, doğruluğu, yanlışlığı və digər keyfiyyətləri maraqlı deyil. Onlar üçün sensasiya lazımdır. Onların yazdıqları lap kiminsə ölümünə səbəb olsun, dəxli yoxdur. Amma, özlərinin quyruğu qapı arasında qalanda ilan dili çıxarırlar.
Bəziləri isə özlərinə çox güvənlidir, arxalarında yüksək çinli məmur dayanıb. A bala, kim dayanır dayansın, heç kim qanundan üstün deyil. Ayıb da olsa deyəcəm, “it qaya kölgəsində yatır, elə bilir ki, öz kölgəsidir”.
Mən rayonda yaşı düşən ailəyə hər dəfə gedə bilmirəm, gərək onda rayona hər gün gedəm. Mən isə gedən zaman 10-15 ailəyə baş çəkirəm. Eləsi olur ki, artıq mərhumun 40 belə çıxıb. Məsələn, dünən Ağsaqqallar Şurasının sabiq sədri Bəşir Bəşirovu ziyarət etdim, həyat yoldaşının vəfatı ilə bağlı evində başsağlığı verdim. Yas mərasimi deyəndə o demək deyil ki, millət yığılıb, sən də gedib orada başsağlığı verirsən. Mən evlərə gedirəm və yaxınlarına başsağlığı verirəm. Məgər insanların evinə gedib başsağlığı vermək qanun pozuntusudur?”.
MCP sədri vurğulayıb ki, insanların kədərini bölüşmək, dərdinə şərik olmaq mənəvi missiyadır:
“Mən, təəssüf ki, bütün yas yerlərinə gedib başsağlığı verməyə vaxt edə bilmirəm. Amma, yası düşən adama dəstək olmaq, başsağlığı vermək, dərdinə şərik olmaq mənəviyyat məsələsidir. Kimin mənəviyyatı kəsaddır, yaxud yoxdursa öz problemidir. Bəziləri şərh yazıb, bəziləri isə katolikdən çox katolik olub, onların hüzürü düşəndə, söz verirəm, başsağlığı verməyəcəm, özləri də aparıb ölülərini hörmətsiz şəkildə dəfn edərlər. Çünki, mənəviyyatları sıfırın altındadır”.
Analoq.az
