Ölkə

İş adamı dövlət başçısına müraciət etdi – CƏNAB PREZİDENT, XİLAS EDİN!

Prezident İlham Əliyevin məmur özbaşınalığı, xüsusilə yüksək vəzifəli şəxslərin övladlarının, yaxınlarının özbaşınalıqları barədə dəfələrlə cəmiyyətə verdiyi sərt, qətiyyətli mesajları əlbəttə ki, bu gün də qüvvəsindədir. Belə ki, ölkəmizdə aparılan uğurlu və davamlı siyasi, iqtisadi və kadr islahatları nəticəsində bir çox “mənəm-mənəm” deyən, özlərini dövlət başçısının təbirincə desək, “xan” kimi aparan, ali qanunvericiliyə etina göstərməyən, qanunları kobudcasına pozan, hətta bir az da irəliyə gedərək, dövlət qanunlarına açıq-aşkar meydan oxuyan fərdlər ədalətli cəzalarını alıblar, bu gün də almaqda davam edirlər. Söz yox ki, yüksək vəzifə sahiblərinin övladları və yaxınları qanunları pozarkən, yalnız cinayət əməli törətdiklərinin deyil, həm də daha ağır cinayətə rəvac verdiklərinin fərqinə ya varmırlar, ya da varmaq istəmirlər – bunun isə adı xalqı dövlətdən narazı salmaqdır.

Xüsusilə, dövlətin iş adamlarına, sahibkarlara göstərdiyi diqqət və qayğısı nəticəsində onların qurduqları fəaliyyətləri həm ölkəyə, həm də vətəndaşlara səmərələr gətirməkdədir. Lakin yerlərdə bir sıra məmurlar və onların qoçu dəstələri sahibkarlara qarşı sözün əsl mənasında reketçiliklər edir, fəaliyyətlərinin davam etdirilmələri üçün təhdid altında saxlayırlar. Belə təhdid və təzyiqlərə məruz qalan iş adamlarından biri də Abdiyev İslam Babaşxan oğludur. Belə ki, onun fəaliyyəti ölkəyə qida məhsulları idxal etməklə ailəsini və çalışdırdığı ailələri dolandırmaqdır. O cümlədən, sahibkar fəaliyyəti istiqamətində yalnız qanunlara riayət edən, nizamlı şəkildə vergilərini ödəyən iş Abdiyev İslam əldə etdiyi gəlirlərinin bir hissəsini ehtiyaclı ailələrə, şəhid və qazi ailələrinə yardım məqsədi olaraq sərf edir.

Üzləşdiyi qanunsuzluqlarla, ona qarşı törədilən cinayətlərlə bağlı iş adamı xilas yolunu ölkə başçısı, Prezident İlham Əliyevə müraciət etməkdə görüb. Çünki onun müraciət etdiyi müvafiq dövlət qurumları, güc strukturları və s. orqanlar nədənsə edilən müraciətlərə etinasız yanaşırlar.

Analoq.az iş adamı Abdiyev İslam Babaşxan oğlunun Azərbaycan Respublikasının Prezidenti cənab İlham Əliyevə müraciətini təqdim edir:

Cənab Prezident

Mən, Abdiyev İslam Babaşxan oğlu uzun illərdir ki, sahibkarlıq fəaliyyəti ilə məşğul oluram. Gündəlik qida məhsullarını ölkəyə idxal edir, bu vasitə ilə ailəmi və ətrafımda olan bir neçə ailəni dolandırıram. O cümlədən, himayəmdə olan ehtiyaclı ailələrə də yardımlarımı əsirgəmir, daim vətəndaşlıq və Allah qarşısındakı borcumdan layiqincə gəlməyə çalışıram. Lakin bütün bunlara baxmayaraq, artıq bir neçə illərdir ki, barəsində söhbət açacağım insanlar mənə və ailəmə qarşı hədsiz təhdidlər, təzyiqlər tətbiq edir, qazandığım halal zəhmət haqqımı zorla əlimdən alır və geri qaytarmırlar. Haqqında bəhs etdiyim əsas şəxs isə, Milli Məclisin deputatı, Azərbaycan Tibb Universitetinin sabiq rektoru, akademik Əhliman Əmiraslanovun köməkçisi və doğma oğlu Əmiraslanov Azər Əhliman oğlu barəsindədir. Belə ki, o da bu işdə tək deyil və deputatın oğluna məxsus, Bakı şəhəri, Nərimanov rayonu, Səməd Vurğun küçəsində yerləşən “A KLUB”da A.Əmiraslanov digər deputat – Mirkazım Kazımovun qardaşı oğlu, tanıdıqları arasında “Seyid” adlandırılan Cəlilabad rayon İcra Haimiyyəti başçısının Cəlilabad şəhəri üzrə nümayəndəsi Kazımov Mirməhəmməd Mirhüseyn oğlu, əslən Cəlilabad rayonundan olan da karxanasının sahibi, Bakı şəhər sakini Məmmədov Ramiz Şirxan oğlu, Masallı rayon Musaküçə kənd sakini Abıyev Layiq Kərim oğlu, Bakı şəhər sakini, Azər Əmirsalanovun “sağ əli” hesab edilən Cavadov Vüqar İmaməddin oğlu, əslən Gürcüstan Respublikasından olan Mustafayev Əbülfət Mustafa oğlu, əlavə 20-25 nəfərdən ibarət dəstə üzvləri ilə birgə mənə qarşı AR CM-nin 182.-ci maddəsində nəzərdə tutulmuş cinayət əməllərini törədiblər.

Möhtərəm Prezident

Sözügedən qoçu və reket dəstəsi 1 gün ərzində mənim azadlığımı zor tətbiq edərək əlimdən almış, məni qeyi-qanuni şəkildə zirzəmidə döyərək girov saxlamış, eləcə də ailə üzvlərini də oğurlayaraq, qətl edəcəklərini bildirmiş, məni saxlanıldığım zirzəmidə çürüdəcklərini hədə-qorxu yolu ilə bildirmişlər. Bu reket dəstəsi məndən 120000 (yüz iyirmi min) ABŞ dolları nəğd pul, 90 min (doxsan min) ABŞ dolları dəyərində müxtəlif mal-material alıb, hədə-qorxu gəliblər və bildirblər ki, əgər bu məsələni ictimailəşdirsəm, öz həyatım ilə yanaşı, ailə üzvlərinin də həyatını məhv edəcəklər. Hətta Azər Əmirsalanov bildirib ki, dünyanın bir çox ölkələrində razborkaları o həll edir, neçə-neçə ölkələrdə onun biznesi var, ona görə də nə polis, nə məhkəmə, nə prokurorluq orqanları, nə də heç bir dövlət strukturu onlara bata bilməz.

Zati Aliləri

Onu da diqqətinizə çatdırım ki, Əmiraslanovun cinayətkar əməllərinə xüsusi dəstək göstərən digər deputatın – Mirkazım Kazımovun qardaşı oğlu, Cəlilabad rayon İcra Haimiyyəti başçısının Cəlilabad şəhəri üzrə nümayəndəsi Kazımov Mirməhəmməd Mirhüseyn oğludur.

Sizin tərəfinizdən nəzarətə götürülən və İcra Hakimiyyətlərində, dövlət qurumlarında aparılan təmizlik işləri nəticəsində üzə çıxan faktlar, ölkə qanunlarını, vətəndaşların hüquqlarını pozanların cəzalandırılmaları hər birimizi sevindirir və bizlər inanırıq ki, Siz hər bir Azərbaycanlının Prezidentisiniz. Siz öz çıxışlarınızda da daim vurğulayırsınız ki, xalqınızın xidmətçisisiniz və məmurlar da ilk növbədə xalqın xidmətçisi olmalıdırlar. Biz də xalq olaraq Sizə güvənir, Sizin ətrafınızda sıx birləşir və atdığınız hər bir mütərəqqi addımı dəstəkləyirik.

Möhtərəm Prezident

Bir vətəndaş olaraq, son ümid yerim və özümün, ailəmin, övladlarımın xilas mənbəyi Azərbaycan dövləti, Azərbaycan Prezidentidir. Bu baxımdan da, Sizin hər bir vətəndaşımıza diqqət və qayğı göstərməyiniz faktorundan yararlanaraq bu müraciətimi etdim.

Allah Sizin və böyük ailənizin dövlətçiliyimizin güclənməsi, qüdrətlənməsi uğrunda həyata keçirdiyi nəhəng işləri davamlı etsin və Rəbbim Sizləri Azərbaycanımızın üzərindən əksik etməsin!

Analoq.az

Teqlər
Daha çox
Back to top button
Close