Mədəniyyət

Gəncə Teatrından açıqlama:”Teatrımız fəaliyyətini dayandırmayıb”

Son günlər Covid-19 virusunun Azərbaycan ərazisində geniş yayılmasının qarşısının alınması məqsədi ilə ölkə ərazisində həyata keçirilən tədbirləri yüksək qiymətləndirərək bu istiqamətdə bir çox sosial məhdudlaşdırma tədbirlərinin həyata keçirilməsinin, kütləvi tədbirlərin, konsertlərin, tamaşaların təxirə salınmasının dövlətimizin öz vətəndaşlarını qorumaq istəyindən irəli gəldiyi qənaətindəyik.

Məlumdur ki, həyata keçirilən sosial izolyasiya tədbirləri çərçivəsində mədəniyyət müəssisələrinin də fəaliyyəti müvəqqəti olaraq dayandırılıb. Təbii ki, insanların sağlamlığının hər şeydən ümdə olması bu addımları zəruri edir.

Bu fikirləri Gəncə Dövlət Dram Teatrının Ədəbi-hissə müdiri, teatrşünas-tənqidçi Anar Burcəliyev Analoq-a deyib. Onun sözlərinə görə “İş prosesinə fasilə verilsə də, müasir texnologiyalar öz evimizdən sosial həyatımızı da, fəaliyyətimizi də müəyyən məcrada davam etdirməyə imkan verir. O cümlədən sosial media, elektron poçt və digər onlayn vasitələrdən istifadə edərək, bir-birimizlə ünsiyyəti davam etdirə bilirik. Elə bu məqsədlə də “evdəqal” çağırışına uyğun olaraq mart ayının 20-dən etibarən həftədə üç dəfə cümə, şənbə və bazar günləri saat 19:00-da Gəncə Dövlət Dram Teatrı özünün Facebook sosial şəbəkəsi üzərindən tamaşalarının onlayn yayımına başladı. Bu da sevimli tamaşaçılarımızla daha sıx əlaqələrin qurulmasına zəmin yaratmış oldu. İlk günlərdə yayımlanan fərqli tamaşalarımıza ümumilikdə 1075 baxış sayı qeydə alındı. Artıq repertuar planımıza uyğun olaraq aprel ayının 1-dən 26-dək hər gün saat 19:00-da Facebook sosial şəbəkəsi üzərindən tamaşalarımızı onlayn yayımlamağa davam edəcəyik” – deyə teatrşünas-tənqidçi Anar Burcəliyev bildirib.

 

Xəbəri qiymətləndir
[Ümumi: 0 Ortalama: 0]

Back to top button