Cəmiyyət

Avropa İttifaqı və BMTİP iqlim dəyişikliyi və onun Azərbaycana təsirləri barədə vətəndaş cəmiyyəti təşkilatlarını maarifləndirir

Dayanıqlı İnkişaf Məqsədi 13 - iqlim fəaliyyəti üzrə göstəricilərə nail olunmasında vətəndaş cəmiyyətinin rolunu dərindən öyrənilir

Avropa İttifaqı (Aİ) və BMT-nin İnkişaf Proqramı Azərbaycanda iqlim dəyişikliyinə cavab tədbirlərini dəstəkləmək üçün vətəndaş cəmiyyəti təşkilatlarının (VCT) potensialının artırılmasına diqqət yetirir. Bu məqsədlə, Aİ-nin maliyyələşdirdiyi “Azərbaycanda innovasiya əsaslı və dayanıqlı vətəndaş cəmiyyətinin inkişafı” layihəsi çərçivəsində 40-a yaxın vətəndaş cəmiyyəti təşkilatı və fəal qrupların iştirakı ilə maarifləndirmə proqramı təşkil edilib. İştirakçılar iqlim riskləri və onun nəticələri, beynəlxalq iqlim sazişləri çərçivəsində ölkələrin öhdəlikləri haqqında ətraflı məlumat əldə ediblər.
Sessiyalar, Bakının ətraf qəsəbəsində yerləşən Qala Etno-Ekoloji Mərkəzində təşkil olunur. Proqram çərçivəsində iştirakçılar iqlim dəyişikliyinin müxtəlif icmalara və iqtisadi sektorlara necə təsir etdiyini müzakirə edir, adaptasiya strategiyaları ilə tanış olur, həmçinin beynəlxalq iqlim danışıqlarını qrup şəklində çalışır və nəticədə, Dayanıqlı İnkişaf Məqsədi 13 – iqlim fəaliyyəti üzrə göstəricilərə nail olunmasında vətəndaş cəmiyyətinin rolunu dərindən öyrənirlər.
İştirakçılar, həmçinin Qala Etnoqrafiya Qoruğundakı muzeylərə, o cümlədən köhnə Qala bölgəsindəki ərazilərə səfər ediblər.
Sözügedən maarifləndirmə proqramı 8 tam iş gününü əhatə edir və oktyabrın ayının ortalarına qədər davam edəcək.
Qeyd edilməlidir ki, Avropa İttifaqının maliyyələşdirdiyi bu layihə, BMTİP tərəfindən həyata keçirilir. Layihə – siyasətlərin formalaşdırılması, yerli inkişafa dəstək və sosial innovasiyanın təşviqi sahələrində VCT-lərin iştirakının artırılması məqsədilə təşkilatların potensialının gücləndirilməsini hədəfləyir.
Avropa İttifaqı öz nou-hausunu, resurslarını və amallarını tədricən birləşdirmək qərarına gəlmiş 27 üzv dövlətdən ibarətdir. 60 ildən artıq genişlənmə müddəti ərzində, onlar, birgə olaraq, mədəni müxtəlifliyi, tolerantlığı və fərdi azadlıqları qoruyub saxlayaraq, sabitlik, demokratiya və dayanıqlı inkişaf zonasını yaradıblar. Avropa İttifaqı öz sərhədlərindən kənarda digər ölkə və xalqlarla öz nailiyyətlərini və dəyərlərini paylaşmağa sadiq olan tərəfdir.
BMT-nin İnkişaf Proqramı BMT-nin aparıcı agentliyi olub, yoxsulluq, bərabərsizlik və iqlim dəyişikliyi ilə mübarizə aparmaqdadır. Biz, 170 ölkədə müxtəlif mütəxəssis və tərəfdaşlarımızdan ibarət geniş şəbəkəmizlə birgə fəaliyyət göstərərək, planet və insanlar üçün hərtərəfli və dayanıqlı həllər üzərində çalışırıq.

Xəbəri qiymətləndir
[Ümumi: 0 Ortalama: 0]

Back to top button